انا قتنا الداخلية !!!

اناقتنا الداخليه ....

السلام عليكم اخر حاجه وقفت عندها في مدوّنتي كانت امتحان الجلديه واني في راحه من بعده لمدة 48 ساعة بس للاسف مانفعش هما يا دوب 24 ساعه وبالعافيه ماعلينا المهم بقى انه انا نسيت اتكلم وافضفض عن اللي حصلي في اليوم ده من مواقف غريبه وعجيبه هو انا مش نسيت هو انا حاولت اتناسى عشان ما ابوّظش على نفسي انتعاشتي باني خلصت الامتحان المتاجل من زمان ده بس مع الاسف وكعادتي مش بعرف انسى بسهوله او يمكن مابنساش خالص قلبي اسود انا عارفه هههههههههه معلش بقى هانعمل ايه ادي الله وادي حكمته المهم نخلينا في الموقف اللي حصل والله ماعارفه احكيه ولا بلاش بس يعني انا مش قادرة ما اقولش ان واحنا واقفين جنب بعض انا وزمايلنا وكعادة اي امتحان عملي في كليتنا ( الطب) بيختلط الحابل بالنابل فبهدوء شديد وبمنتهى الادب بقول للزملاء الافاضل( الرجال) ياريت يا جماعه نخلي مكان فاضي بس بين البنات والولاد ماحدش ردّ عليا وتظاهروا بانهم بيوسعوا طبعا بالوهم يعني ، ومافيش دقيقتين ولقيت الزقّ والدفع بيزيد ولما التفتله وقولته يا دكتور من فضلك حضرتك بتزوقني تفتكروا رد عليا قالي ايه؟؟ قالي بمنتهى الرقة وعلى وجهه براءة صغار التماسيح يادكتورة انا واقف ثابت حضرتك اللي بتيجي شمال (لانه كان واقف على شمالي) وكأن انا احساسي بساعده الاكثر من سميك انعدم او يمكن الحبل الشوكي عندي باظ فجأة وانا واقفة فما بقيتش متزنة فجأة وحصل اكساجيريشن في الريسبونس !!!!!! يجوز برده كل شيء وارد اصله في الزمن ده وفي كليتنا بالذات طبعا ماتسالوش عن ردي لانه انا ساعتها لقيت انه ابلغ رد هو عدم الرد على امثاله انا بصيتله كده وقولتله وانا ببتسم ابتسامة غريبة انا نفسي ما اعرفش كان سرها ايه او حتى ايه سببها وكررت جملته قولتله انا اللي باجي شمال !!!! قالي برده وبنفس البراءة المميتة ايوة قولتله طيب معلش حقك عليا ، وفي الاخر دخلنا انا وهو نفس الشيفت لاننا كنا واقفين قدام الباب مباشرةً فتساءلت بعدها بيني وبين نفسي ليه الناس بتعمل كده ؟ ليه الاسلوب الفجّ بقى هو الطبيعي والعادي في حياتنا ليه قلّة الاحترام او ربما عدمه من اساسه بقى هو السلوك الاساسي والأوّلي في يومنا وبنبقى عاملين حسابنا عليه من قبل حتى ماننزل من بيوتنا الزميل الفاضل ده كان لابس بدلة شيك جدا ومكويه كويس قوي يعني لو بس بنبذل واحد على مليون من المجهود اللي بنبذله على تلميع واناقة مظهرنا الخارجي في تنظيف دواخلنا واناقة اخلاقنا اعتقد كانت سلوكياتنا هاتختلف مليون في المائة لكن الامر بعد هذا التساؤل لم ياخذ معي الكثير عارفين ليه لانه ببساطه شديدة استرجعت في ذهني موقف حصل مش من بعيد من اجازة نص السنه بس وهو كالاتي:

كنت في مشوار للكليه اضطريت انزله في الاجازة واتفقت اقابل اقرب صديقاتي الى نفسي يوميها في ساعه فاضيه عندها قبل الكورس بتاعها وقد كان وجبنا فطار وقعدنا في مكانا المفضل اللي بيعتبر معزول نوعا ما ( احنا البنتين الوحيدين اللي بنقعد فيه على فكرة) وبعد مافطرنا وخلصنا من شدة اشتياقنا لبعض تبادلنا القبلات النسائية العادية والبريئة جدا جدا وفجأة احنا الاتنين وفي نفس اللحظه التفتننا حوالينا لايكون حد شافنا وافتكر انه احنا بنات مش كويسه هههههه في حين انه لو اي اتنين واحد وواحده عملوا اكتر من كده لن يُحرك احد ساكنا لا منهم ولا من اللي حواليهم وساعتها قولتلها يا سبحان الله اصبح الحب في الله هو الشي الذي يختبئ ويخشى الاقاويل !!!!!!

لما تذكرت هذا الموقف قولت يبقى اللي حصل قبل الامتحان كان عادي ويمكن اقل من العادي لانه هي ده سمة عصر الحداثة الا لعنة الله عليها من حداثه حينما نفقد اخلاقنا وقيمنا ونتخلى عن شهامتنا ونخوتنا مهما كانت الاسباب والدوافع وتذكرت قول خير الانام جاء الاسلام غريبا وسيعود غريبا كما جاء !!

انا مش مكبرة الامور والله وان كان ده موقف صغيّر في نظر من يقرأه فهذا مثال مصغّر لما يحدث كل يوم .......

اشوفكم في قصديتي الجديدة .